د دولتی ادارو وېبپاڼې په نوي دیزاین او سیستم بدلیږي

نن سه شنبه ۱۳۹۷ کال د میزان د میاشتې ۳ مه نیټه د مخابراتو او معلوماتي ټکنالوجۍ وزارت د غونډو په تالار کې د وزارتونو او دولتي ادارو د نويو ویبپاڼو په اړه غونډه وشوه چې د دولتي ادارو د معلوماتي تکنالوجۍ رئیسانو او نورو مسؤولینو هم پکې گډون درلود.

د غونډې په پېل کې د مخابراتو او معلوماتي ټکنالوجۍ وزارت د IT رياست له خوا د نويو ویبپاڼو د پروژې په اړه مفصل او هر اړخيز پریزنتیشن وړاندې شو.

د مخابراتو او معلوماتي تکنالوجۍ وزارت رهبري د سیستمونو پرمختیا او دالکترونیکي حکومت دارۍ د پراختيا او ودې لپاره منظم پلانونه لري چې په دې لړ کې عملي گامونه هم اخیستل شوي دي.

نشرات د وزارت یو مهمه برخه ده او ویب سایټ په دې لاره کې اړینه ونډه اجرا کوي چې ضروري او زياته پاملرنه ورته په کار ده.

د پريزنټېشن وروسته د دولتي ادارو اړوندو مسؤولينو پوښتنې وکړې او تر څنګ يې د وزارت ددغه پروژې د ستاينې تر څنګ په اړوندو برخو کې د همکارۍ ژمنې وکړې.